Það virðist vera sem foreldrar slaki á útivistarreglunum þegar barnið eldist.  Við það getur hætta á áhættuhegðun barnsins aukist eins og t.d. fikt með áfengi eða aðra vímugjafa. 

Bæjarráð Reykjanesbæjar tók þá ákvörðun á fundi sínum í gær að fela starfshópi um sumarvinnu ungs fólks frekari útfærslu á verkefnum fyrir samtals 26 milljónir króna til að skapa sumarstörf fyrir allt að 200 einstaklinga í 4 vikur. Verkefnin eru fyrir ungmenni 17 ára og eldri og fela í sér vinnu við fegrun umhverfis s.s. skógrækt, garðyrkju, hreinsun og fl. Verkefnið er unnið í samstarfi við Vinnumálastofnun og Skógræktarfélag Suðurnesja og fl. Samkvæmt upplýsingum frá Vinnumálastofnun eru 279 ungmenni á aldrinum 17 - 25 ára í Reykjanesbæ á atvinnuleysisskrá. Til viðbótar er ungt skólafólk sem leitar að sumarvinnu. Stefnt er að því að vinnuhópurinn skili endanlegum tillögum til bæjarráðs í lok apríl.

Af http://rnb..is 17.4.2009

Fjölskyldu- og félagsþjónustan minnir á að útivistartími barna og unglinga tekur breytingum 1. maí og þá mega 12 ára börn og yngri vera úti til kl. 22:00 en 13-16 ára unglingar mega vera úti til kl. 24:00. Börn mega ekki vera á almannafæri utan fyrrgreinds tíma nema í fylgd með fullorðnum. Útivistarreglurnar eru samkvæmt barnaverndarlögum og er þeim m.a. ætlað að tryggja öryggi barna auk þess sem mikilvægt er börnum og unglingum að fá nægan svefn.

Af http://www.rnb.is

Gylfi Jón Gylfason heldur fræðslufund vegna hvatagreiðslna á morgun 28. apríl í félagsheimili Keflavíkur, Hringbraut 108 kl. 18:00.

Fyrirlesturinn er ætlaður foreldrum 14 ára barna sem hyggjast nýta sér hvatagreiðslurnar til niðurgreiðslu á menningar-, íþrótta- og tómstundastarfi.

Af http://rnb.is

Aðalfundur Heimilis og skóla- landssamtaka foreldra verður haldinn fimmtudaginn 30.apríl kl. 16:00 að Suðurlandsbraut 24, 3.hæð.

Dagskrá: Hefðbundin aðalfundarstörf.

Stjórnin

Símatími FFGÍR er alla virka daga frá kl. 12:30 til 13:30. Foreldrar og velvildarfólk er hvatt til að hafa samband við verkefnastjóra FFGÍR.

Það er mikilvægt að við tölum saman og styðjum þannig við menntun og velferð grunnskólabarna í Reykjanesbæ.

Sími FFGÍR er 868-4495 og netfang ffgir@ffgir.is

Ingigerður Sæmundsdóttir, verkefnastjóri.

FFGÍR félag foreldra og foreldraráða í grunnskólum Reykjanesbæjar stóð fyrir opnum fundi síðastliðinn laugardag. Á fundinum fengu foreldrar svör við ýmsum spurningum er snúa að börnum í Reykjanesbæ. Fundurinn hófst með ávarpi Bjarkar Guðjónsdóttur, alþingismanns og síðan tók Haraldur Árni Haraldsson, skólastjóri Tónlistarskólans í Reykjanesbæ, við fundarstjórn. Hjördís Árnadóttir, félagsmálastjóri, Stefán Bjarkason frá Íþrótta- og tómstundasviði og Garðar Vilhjálmsson formaður fræðsluráðs, svöruðu spurningum um velferð barna í Reykjanesbæ.  Umræða spannst um frístundaskólann og stefnumótun er varðar hann, heitar máltíðir fyrir börn, fjárhagserfiðleika, niðurskurð, brottfall úr íþróttum og leikskólamál.

 Barnakórar hjálpræðishersins, Stjörnugospel, 1. til 4. bekkur og Gleðigospel, 5. til 10. bekkur sungu þrjú lög. Það var mikið stuð hjá krökkunum og voru lagatextarnir með boðskap til barna og unglinga. Ester D. van Gooswilligen kynnti starf hersins í Reykjanesbæ. Allir eru velkomnir að vera með í starfi hersins í byggingu 742 við hliðina á húsi Virkjunar á Vallarheiði. Ýmsir sönghópar eru hjá hernum og hittast foreldrar jafnvel með ungabörn til að syngja saman.

Dr. Árelía Eydís Guðmundsdóttir, fjallaði um foreldrahlutverkið, kröfur til foreldra og mikilvægi þess að foreldrar sinni sjálfum sér til að geta sinnt börnunum. Salurinn hló og skemmti sér undir fyrirlestri hennar og hafa margir geta samsamað sig við dæmisögurnar. Höfðu áheyrendur á orði eftir erindi hennar  að hún hefði gefið öllum nokkra gullmola til að hafa í farteskinu.

Í hádeginu léku þrjár strengjasveitir frá Tónlistarskóla Reykjanesbæjar undir stjórn Önnu Hugadóttur og var hugguleg stemmning í salnum þar sem fólk gæddi sér á brauði með pestó og blómkálssúpu. Kynningarbásar á fundinum voru frá Reykjanesbæ, foreldrafélögum allra skólanna,Fjörheimum, FFGÍR, Lundi, íþróttafélögum, Bókasafni Reykjanesbæjar, Verndurum barna, KFUM og K og æskulýðsstarfsemi í Keflavíkursókn.

Gylfi Jón Gylfason, sálfræðingur hélt fundinum áfram klukkan eitt og sagði frá nýju verkefni hjá Reykjanesbæ sem hann hefur ásamt Berglindi Bragadóttur sálfræðingi unnið að í tvö ár. Verkefnið heitir Félagar ( Friends for life). Erlendar rannsóknir sýna að námsefnið dregur úr þunglyndis og kvíða einkennum hjá þeim sem tileinka sér það og eykur mótlætaþol þeirra. Þetta er gert með því að kenna unglingunum aðferðir til að takast á við erfiðleika í lífsleiknitímum. Þetta verkefni kemur því á hárréttum tíma í miðri kreppunni þar sem kvíði og óöryggi hefur aukist mikið í samfélaginu. Mjög áhugavert og þarft verkefni og ætti að vera öllum sem vinna með unglingum mikið fagnaðarefni.

Svanhildur Eiríksdóttir, deildarstjóri barnastarfs á Bókasafni Reykjanesbæjar, flutti erindi um mikilvægi lesturs, las skemmtilega fyrir börn og fullorðna og sagði frá barnastarfinu á bókasafni Reykjanesbæjar. Erindi Svanhildar var bæði fróðlegt og hvetjandi fyrir foreldra að lesa meira fyrir börnin alveg frá því þau eru ungabörn.

Kristjana Guðlaugsdóttir, foreldri í stjórn FFGÍR, lauk fundinum með erindi sem fjallaði um ánægjustundir fjölskyldunnar. Hún sagði frá hvernig fjölskyldan getur skipst á að skipuleggja samverustund. Taka frá einn dag í viku, þar sem því væri viðkomið, annaðhvort laugardag eða sunnudag. Hver fjölskyldumeðlimur skipuleggur eitthvað sem fjölskyldan gerir saman og allir eru þátttakendur. Hægt er að baka pizzu, fara í sund, fara í Sólbrekkuskóg, bíó eða á safn. Það eru til óteljandi hugmyndir að afþreyingu fyrir fjölskyldur og hvatti hún foreldra til að leyfa börnunum að vera með í ákvarðanaferlinu. Gera þau ábyrg og ánægð með samverustundir fjölskyldunnar. Rannsóknir sýna að börn meta mest að eiga samverustund með fjölskyldunni.

FFGÍR þakkar öllum þátttakendum, fundarmönnum og síðast en ekki síst unglingum frá KFUM og K sem sáu um barnapössun allan daginn.

Fulltrúar FFGÍR þakka öllum þátttakendum, fundarmönnum og síðast en ekki síst unglingum frá KFUM og K sem sáu um barnapössun allan daginn á opnum fundi FFGÍR síðastliðinn laugardag.

FFGÍR bindur miklar væntingar til nýs verkefnis sem Gylfi Jón Gylfason, sálfræðingur kynnti fyrir fundarmönnum. Verkefnið er nýtt hjá Reykjanesbæ en hann hefur ásamt Berglindi Bragadóttur sálfræðingi unnið að því í tvö ár.

Verkefnið heitir Félagar ( Friends for life). Gylfi Jón sagði erlendar rannsóknir sýna að námsefnið dregur úr þunglyndis og kvíða einkennum hjá þeim sem tileinka sér það og eykur mótlætaþol þeirra. Þetta er gert með því að kenna unglingunum aðferðir til að takast á við erfiðleika í lífsleiknitímum.

Verkefnið kemur því á hárréttum tíma í miðri kreppunni þar sem kvíði og óöryggi hefur aukist mikið í samfélaginu. Mjög áhugavert og þarft verkefni og ætti að vera öllum sem vinna með unglingum mikið fagnaðarefni.

FFGÍR vill sérstaklega þakka Hjördísi Árnadóttur, Stefáni Bjarkasyni og Garðari Vilhjálmssyni fyrir að sitja fyrir svörum og Haraldi Árna Haraldssyni góða fundarstjórn.

Einnig þakkar FFGÍR Heru Ósk Einarsdóttur, forvarnarfulltrúa fyrir hennar aðstoð, Björk Guðjónsdóttur, dr. Árelíu Eydísi Guðmundsdóttur, Gylfa Jóni Gylfasyni, Svanhildi Eiríksdóttur og Kristjönu Guðlaugsdóttur fyrir þeirra erindi.

Fundurinn heppnaðis vel og mun FFGIR birtir niðurstöður og svör við spurningum hér á heimasíðunni.

FFGÍR barst fréttatilkynning frá Foreldrasamtökum gegn áfengisauglýsingum:

Undanfarið hefur staðið yfir markviss áfengisauglýsingaherferð í tilefni “20 ára afmæli bjórsins”. Auglýsingum er beint að börnum og unglingum. Hagsmunaaðilar brjóta lögin dag út og dag inn að virðist átölulaust. Viðskiptasiðferði þessara aðila er á lægsta plani og virðing fyrir lögvörðum réttindum barna og unglinga er engin.

Útvarpsstöðvar sem höfða sérstaklega til barna og unglinga auglýsa bæði bjór og sterka áfenga drykki í gegnum auglýsingar á vínveitingahúsum. Einstaklega ósmekklegt þar sem markhópur viðkomandi útvarpsstöðva hefur ekki aldur til að sækja viðkomandi vínveitingahús. Ríkissjónvarpið sem hefur ríkum skyldum að gegna og vera öðrum miðlum fordæmi, birtir reglulega áfengisauglýsingar og nú síðast án þess að reyna á nokkurn hátt að snúa út úr skýrri löggjöf um bann við áfengisauglýsingum.

Vinsælir þættir á Skjá einum eru kostaðir af áfengisframleiðendum með tilheyrandi áfengisauglýsingum  og svona mætti lengi telja.

Foreldrasamtök gegn áfengisauglýsingum spyrja einfaldlega:

Hvar er ákæruvaldið?

Hvar er útvarpsréttarnefnd?  

Hvar er hin ritstjórnarlega ábyrgð?

Hvar eru borgar- og bæjaryfirvöld sem veita jákvæðar umsagnir um vínveitingaleyfi til vínveitingastaða sem þverbrjóta lög?

Foreldrasamtök gegn áfengisauglýsingum skora á almenning að sýna hug sinn í verki og senda inn ábendingar um brot á banni við áfengisauglýsingum.

Það er hægt að gera með einföldum hætti rafrænt í gegnum heimasíðu samtakanna www.foreldrasamtok.is á slóðinni  http://foreldrasamtok.is/?p=kaerubref

Foreldrasamtök gegn áfengisauglýsingum

www.foreldrasamtok.is

Foreldrafélag Holtaskóla í Reykjanesbæ bíður forráðamönnum nemenda í unglingadeild skólans uppá fyrirlesturinn: Tölum saman.

Tölum saman er sameiginleg fræðsla fyrir foreldra og unglinga um kynlíf og kynhegðun. Foreldrafélagið í Holtaskóla  stóð fyrir slíkum fyrirlestri síðast árið 2006 við mikla ánægju foreldra og unglinga.

Gengið er út frá því að auðvelda umræður foreldra og unglinga um kynlíf. Unglingsárin eru tími mikilla breytinga sem taka á félags-, líffræði- og tilfinningalegum þáttum. Málefni er varða kynlíf og kynhegðun eru ofarlega í huga flestra unglinga og margir foreldrar vita ekki hvernig þeir eigi að snúa sér í þeirri umræðu.

Rannsóknir sýna að ef þessi málefni eru rædd þá byrja unglingar seinna að stunda kynlíf og þeir verða ábyrgari.


Fyrirlesarar eru:
Dagbjört Ásbjörnsdóttir, mannfræðingur, MA
Sigurlaug Hauksdóttir, félagsráðgjafi, MA
Guðbjörg Edda Hermannsdóttir, félagsráðgjafi, MA

Staður: Salur Holtaskóla
Tími: Fimmtudagurinn 19. febrúar 2009
7. - 8. bekkur 17:30 - 19:00
9. - 10. bekkur 20:00 - 21:30

Málþingið verður í Virkjun á Vallarheiði 14.mars og er opið öllum í Reykjanesbæ til skrafs og ráðagerða um börn og málefni þeirra á erfiðum tímum. Á málþinginu verða fræðsluerindi og gefst fólki kostur á að koma með fyrirspurnir.

Kynningarbásar
Aðstaðan í húsi Virkjunar er það góð að við ætlum að bjóða félagasamtökum skólum, stofnunum og aðilum sem vinna með börn í Reykjanesbæ að vera með kynningu á sínu starfi. Þeir sem hafa áhuga á að vera með eru beðnir um að hafa samband við Ingigerði Sæmundsdóttur, verkefnastjóra FFGÍR  til að panta aðstöðu.

Dagur stærðfræðinnar 2009, þrautasamkeppni og verkefnabanki

Dagur stærðfræðinnar er haldinn fyrsta föstudag í febrúar ár hvert. Í ár ber dag stærðfræðinnar upp föstudaginn 6. febrúar og er þema dagsins að þessu sinni þríhyrningar. Á heimasíðu Flatar samtaka stærðfræðikennara má finna verkefnabanka fyrir nemendur í leik, grunn- og framhaldsskólum. Kennarar eru hvattir til að skoða þessi verkefni og nýta sér þau. Einnig mun verða haldin þrautasamkeppni fyrir nemendur í 1. - 10. bekk grunnskóla. Hver bekkur má senda inn eina lausn. Dregið verður úr réttum lausnum og verðlaun veitt á hverju skólastigi. Allir bekkir sem senda inn réttar lausnir fá viðurkenningarskjöl.

Af vef Kennarasambands Íslands.

4. febrúar sl. hófst „Lífshlaupið“ í annað sinn á vegum Íþrótta- og Ólympíusamband Íslands, ÍSÍ. Lífshlaupið mun fara fram dagana 4. – 24. febrúar en markmið verkefnisins er að hvetja landsmenn til daglegrar hreyfingar. Nánari upplýsingar um Lífshlaupið má finna á vefsíðunni www.lifshlaupid.is  en meðal annars er hægt að taka þátt í vinnustaðakeppni og hægt er að skrá lið inn allt til síðasta dags.

Skemmtilegt fyrir alla að taka þátt og hreyfa sig daglega, hvort sem það eru nemendur, foreldrar eða fagaðilar í skólunum.

Starfshópur á vegum menntamálaráðuneytis vann skýrslu með tillögum til eflingar mannréttindafræðslu í grunn- og framhaldsskólum. Tillögunum er ætlað að vera hugmyndagefandi en áhersla er lögð á samstarf innan skólans og við nærsamfélagið á heildrænan hátt.

Í markmiðsgreinum nýrra laga um leik-, grunn- og framhaldsskóla er hlutverk skólanna að stuðla að alhliða þroska allra nemenda og virkri þátttöku þeirra í lýðræðisþjóðfélagi. Áhersla á velferð nemenda í íslenskum lögum, alþjóðlegt samstarf um borgaravitund og mannréttindi í menntun og framkvæmdaáætlun Sameinuðu þjóðanna bera vitni um þá vitundarvakningu sem hefur orðið. Nemendur þurfa tækifæri til að styrkja sig við að takast á við daglegt líf í sífellt breytilegum og flóknari heimi.

Í skýrslunni er lagt er til að hver skóli geri framkvæmdaáætlun sem gæti m.a. innihaldið stutta lýsingu á mannréttindafræðslu skólans, hæfni- og færnimarkmið fyrir nemendur, leiðir að markmiðum, hverjir koma að verkefninu, félags- og tómstundastarf, samstarf við foreldra, aðföng , hvernig á að meta árangur, tímaramma og fjármagn sem til þarf.

Skýrslan er aðgengileg á heimasíðu ráðuneytisins. http://bella.mrn.stjr.is/utgafur/skyrsla_mannrettindafraedsla_08.pdf

„Ráðuneytið lagðist gegn þeim.  Í nýrri löggjöf um samfellu náms á fyrstu þremur skólastigum íslenska skólans, sem tók gildi í fyrrasumar, eru ákveðnar reglur, meðal annars um það með hvaða skilyrðum nemendur eru teknir inn í framhaldsskóla. Þeir eiga að líta á skólaeinkunnir nemenda þegar þeir koma beint úr grunnskólum. Það er stóra viðmiðunin,“ segir Þórir Ólafsson, sérfræðingur á skrifstofu menntamálaráðuneytisins.

Í stað samræmdra prófa í 10. bekk verða samræmd könnunarpróf í stærðfræði, íslensku og ensku í byrjun skólaársins. Framhaldsskólarnir fá ekki niðurstöður úr þeim könnunum, heldur niðurstöður úr vorprófum nemenda.

Þorkell H. Diego, yfirkennari í Verzlunarskóla Íslands, segir að vegna afnáms samræmdu prófanna hafi menn velt upp hugmyndum í sambandi við innritun nýrra nemenda, meðal annars inntökuprófi.

„Framkvæmdin er dýr og menn sáu í hendi sér að hún gengi ekki upp fyrir þann fjölda sem við erum með. Afnám samræmdra prófa er ákveðinn þáttur sem við höfum áhyggjur af en við verðum að treysta því að skólarnir fari eftir námskrá og að einkunnin 7 í einum skóla sé sambærileg við einkunnina 7 í öðrum,“ segir Þorkell.

Skólastjórnendur í Verzlunarskólanum hafa þegar ákveðið hvernig valið verður inn í skólann fyrir næsta skólaár, að sögn Þorkels. „Við gerum ráð fyrir að allir læri það sama hjá okkur á fyrsta ári. Við tökum mið af fjórum skólaeinkunnum, íslensku, stærðfræði, ensku og dönsku eða öðru Norðurlandamáli þar sem íslenska og stærðfræði hafa tvöfalt vægi. Sumir skólar velja beint inn á brautir og hafa þá önnur viðmið.“

Kristinn Breiðfjörð, skólastjóri Foldaskóla í Grafarvogi og formaður stjórnar Skólastjórafélags Íslands, segir samræmdu prófin hafa stýrt kennslunni töluvert. „Nú ætti að draga verulega úr því. Það var töluverð gagnrýni á samræmdu prófin í því formi sem þau voru. Samræmdu könnunarprófin, sem verða í byrjun skólaárs, eiga að koma að gagni fyrir nemendur og skólann. Það verður þá hægt að bregðast við í samræmi við kunnáttu nemenda.“ Að sögn Kristins verða samræmdu könnunarprófin lögð fyrir nemendur í vor 2009 þar sem of skammur tími hafi verið til undirbúnings frá því að nýja löggjöfin tók gildi.

Af vef landssamtakanna Heimili og skóli.

Ingigerður Sæmundsdóttir hefur tekið við starfi verkefnastjóra FFGÍR frá 1.febrúar 2009. Ingigerður hefur töluverða reynslu af foreldrasamstarfi bæði sem foreldri og kennari í grunn- og framhaldsskóla. Hún hlakkar til að takast á við verkefni FFGÍR með foreldrum og velunnurum grunnskólabarna í Reykjanesbæ.

Ingigerður útskrifaðist frá Kennaraháskóla Íslands 1997 og kenndi stærðfræði og upplýsingatækni í grunn- og framhaldsskólum í tíu ár. Hún lýkur meistaranámi í viðskiptasiðfræði frá Háskóla Íslands nú í vor. Hún býr í Reykjanesbæ og er gift Bjarna Jóhannssyni, knattspyrnuþjálfara og framhaldsskólakennara og eiga þau þrjú börn og eitt barnabarn.

Í tilefni að alþjóðlega netöryggisdeginum 10. febrúar stendur SAFT fyrir málþingi um rafrænt einelti í Skriðu, Háskóla Íslands, við Stakkahlíð, kl. 14.30 – 16.15.

Á málþinginu, sem heilbrigðisráðherra setur, verður m.a. fjallað um:

·         tegundir og birtingaform rafræns eineltis

·         nýja rannsókn á rafrænu einelti

·         tæknilegt umhverfi rafræns eineltis

·         eftirlit foreldra

·         afskipti og meðferð lögreglunnar á rafrænu einelti

·         sál- og félagsfræðilegar hliðar eineltis

Fundarstjóri verður Þorlákur Helgason, framkvæmdastjóri Olweusarverkefnisins á Íslandi.

Þátttökugjald á málþing er ekkert en gestir eru vinsamlega beðnir um að tilkynna þátttöku á saft@saft.is. Boðið verður upp á veitingar.

Sérstök athygli er vakin á því að málþingið verður einnig sent út á vefnum, vefslóð fyrir netútsendingu er http://sjonvarp.khi.is/

Nánari upplýsingar á heimasíðu SAFT, www.saft.is

SAFT, vakningarverkefni um jákvæða og örugga netnotkun barna og unglinga á netinu og tengdum miðlum, hefur á síðustu árum staðið fyrir viðburðum á alþjóðlega netöryggisdaginn. Í ár standa SAFT, Heimili og skóli, Síminn, Microsoft Íslandi, menntamálaráðuneytið og Lýðheilsustöð, sameiginlega að málþingi um rafrænt einelti þennan dag.

Í gær, 22.mai, voru afhendar 50 milljónir úr Manngildissjóðif, þar af fékk FFGÍR 1,5 milljóna styrk til að halda úti starfi sínu næsta skólaár. Einnig fengu samtökin 100 þús. vegna Hvað ef? verkefnis þegar 9.bekkjum bæjarins var boðið á skemmtifræðslu leikrit um vímuvarnir. Fagnar FFGÍR því að geta haldið úti starfi sínu óbreyttu við að efla foreldrastarf í bænum og vera málsvari foreldra grunnskólabarna.

Hlutverk Manngildissjóðs er að veita fjárhagslegan stuðning, styrki og viðurkenningar til verkefna á sviði fræðslu, fjölskyldu- og forvarnarmála, menningar- og lista, umhverfismála, tómstunda- og íþróttamála eða til stuðnings verkefna í þágu mannræktar og aukins manngildis í Reykjanesbæ.

Hér má sjá tilnefningar almennings til Fjöreggs FFGÍR, en þá viðurkenningu hlýturt.d.  einstaklingur, vinnustaður, samtök o.s.frv. sem er/eru að vinna  gott starf í þágu barna og fjölskyldna í Reykjanesbæ.  Sérstök athygli verður veitt sjálfboðastarfi. Fjöreggið verður afhent mánudaginn 2.júní nk. í Bíósal Duushúsa kl. 17:00

Einkum er litið til aðila sem starfa/ð hefur/hafa að:

    * ...eflingu tengsla heimila og skóla.
    * ... forvörnum fyrir börn/unglinga.
    * ... eflingu og stuðningi fyrir foreldra/foreldrastarf.

Eftirfarandi tilnefningar bárust:

-Erlingur Jónsson, Lundur-Forvarnir - aðstoð við aðstandendur ungra fíkniefnaneytenda og forvarnarstarf.

-Akurskóli, Jónína Ágústsdóttir skólastjóri -“Ég og þú, þú og ég, við tvö saman” námskeið í Akurskóla.

-Erla Guðmundsdóttir, æskulýðsfulltrúi í Keflavíkurkirkju-Uppbygging æskulýðsstarfs. 

-Tónlistarskóli Reykjanesbæjar-Samþætting tónlistarnáms í grunnskólana og fyrir að gera tónlistarnám aðgengilegt öllum.

-Heiðarskóli - Árlegur Fjölskyldudagur sem stuðlar að auknum samskiptum heimila og skóla.

-KFUM og K í Reykjanesbæ - Ókeypis fyrirlestraröð fyrir foreldra um börn og trú veturinn 2008

Dagur barnsins verður haldinn hátíðlegur í fyrsta sinn á Íslandi þann 25. maí, 2008. Þetta er liður í auknum áherslum ríkisstjórnarinnar á málefni yngstu kynslóðarinnar.

Það var Jóhanna Sigurðardóttir félagsmálaráðherra sem kynnti hugmyndina fyrir ríkisstjórninni og var henni falið að stýra undirbúningi að því að festa daginn í sessi, meðal annars með því að tryggja honum stöðu í Almanaki Háskóla Íslands. Jóhanna segir að stefnt sé að því að halda daginn hátíðlegan hér á landi síðasta sunnudag í maí ár hvert .

Áherslan er á að kynna daginn, sem dag þar sem börn fá að njóta samvista við foreldra sína, án fjárútláta, undir yfirskriftinni, Gleði og samvera.Til dæmis skoða merka staði í sveitafélaginu,  fara í lautarferð, fjallgöngu eða fjöruferð.  Nýta sérkenni og möguleika viðkomandi sveitafélags sem best.

Sjá heimasíðuna www.dagurbarnsins.is

Eftirfarandi bréf hefur borist skólum og foreldrafélögum varðandi hjóladag:

Þann 26. maí eru 40 ár síðan hægri umferð var lögleidd hér á landi.  Haldið verður upp á þessi tímamót með ýmsum hætti vikuna 26. til 30. maí.  Meðal annars verður lögð áhersla á öryggi barna í umferðinni og þá ekki síst varðandi hjólreiðar.  Einn liður í því verkefni er að hvetja skóla landsins til að halda hjóladag.  Meðfylgjandi er skjal þar sem sagt er frá því helsta sem þarf að hafa í huga þegar skipuleggja þarf hjóladag auk hugmynda um uppsetningu hjólabrauta og fleira.

Við hvetjum ykkur til að nýta ykkur þessar hugmyndir og ef einhverjar spurningar vakna þá getið þið haft samband við eftirtalda aðila:

Sigrún A. Þorsteinsdóttir, sviðstjóra á slysavarnasviði Landsbjargar, sigrun@landsbjorg.is

Guðmundur Karl Einarsson, hjá Brautinni, bindindisfélagi ökumanna, brautin@brautin.is eða panta veltibílinn á veltibill@brautin.is

Ólöf Dagný Óskarsdóttir, verkefnastjóri hjá Heimili og skóla, olof@heimiliogskoli.is

 
Heimili og skóli

Slysavarnafélagið Landsbjörg

Umferðastofa

Brautin

Vegagerðin

Við minnum á erindi Nönnu Kristínar Christiansen, “Hvernig á samstarf við foreldra samtímans að vera og hvers vegna?” í Njarðvíkurskóla þriðjudaginn 6.maí nk. kl. 14:30. Þáttaka er ókeypis en áhugasamir eru hvattir til að skrá sig á ffgir@ffgir.is

Nanna mun þar segja gefa góð ráð og gefa hagnýt dæmi, segja frá þróunarstarfi á þessu sviði og fjalla um stöðu fjölskyldunnar í samtímanum.

Gott samstarf foreldra og kennara leiðir alltaf til betra skólastarfs. Það stuðlar m.a. að jákvæðari viðhorfum foreldra, sem leiða til jákvæðari nemenda, betri vinnufriðar og bættum skilum á heimavinnu. Þetta hefur svo aftur jákvæð áhrif inn á heimilið og fjölskyldulífið. Kennarar og foreldrar eru sífellt að verða meðvitaðri um mikilvægi góðs samstarfs því það bætir hag barnsins, skólans og fjölskyldunnar til lengri tíma. Þó er það svo að flest börn verja miklum tíma í skólum þar sem foreldrarnir koma stopult, og þá í hlutverki gesta. Þátttaka margra foreldra í skólastarfi barnanna er óveruleg. Því er mikilvægt að finna leiðir til að auka hlutdeild foreldra í skólastarfi barna sinna.  Þar gegna kennarar mikilvægu leiðtogahlutverki að mati Nönnu.

Nanna lauk M.Ed.-námi í uppeldis- og menntunarfræði frá Kennaraháskóla Íslands 2005 og fjallaði rannsókn hennar um faglegt hlutverk kennara í foreldrasamstarfi.

FFGÍR-Foreldrafélög og foreldraráð grunnskólanna í Reykjanesbæ

Bréf þetta barst frá Heimili og skóla:

Ágætu meðlimir í foreldraráðum

Vinsamlega kynnið ykkur hvort foreldrar í ykkar skólasamfélagi hafa skoðanir á fyrirkomulagi ökunáms og ökuprófa.
Samgöngurráðuneytið skipaði nýlega starfshóp til að ræða fyrirkomulag ökunáms og tengingu þess við umferðarfræðslu grunnskólanna og hugsanlega einnig fyrirkomulag ökuprófa.  María Kristín Gylfadóttir, formaður Heimilis og skóla á sæti í hópnum sem fulltrúi samtakanna.  Starfshópurinn er nú að hefja störf og óskar eftir ábendingum frá baklandi hvers hagsmunaaðila sem á sæti í hópnum um hvernig mætti bæta eða breyta fyrirkomulagi ökunáms og prófa og umferðarfræðslu í skólum landsins. 

Þetta er mikilvægt málefni og brýnt að rödd foreldra og almennings heyrist í þessari vinnu.  Ef þú hefur ábendingar, vinsamlegast sendu okkur þær á bjork@heimiliogskoli.i eða heimiliogskoli@heimiliogskoli.is fyrir 14. apríl nk.

Eftirfarandi bréf var sent til foreldra 8.-10.bekkinga í gegnum Mentor:

Hugleiðingar vegna árshátíðar 8.-10. bekkja grunnskólanna

Án efa hafa foreldrar orðið varir við ýmist tilstand í kringum árshátíð grunnskólanna sem verður þann 10.apríl nk. Vert er að minna á að í kjölfar annara balla í okt. og des. sl. óskuðu foreldrar eftir umræðu um ýmislegt óæskilegt í kringum þessi böll, s.s. hópþrýsting um mikinn tilkostnað og umstang, sem og limmósínur sem unglingarnir leigðu sem skapaði streitu og ýtti undir einelti og vanlíðan margra. Kostnaður á hvert og eitt barn getur hlaupið á tugum þúsunda króna og þessu fylgir mikil streita á sumum heimilum. Við erum að tala um ný föt, jafnvel  förðun og hárgreiðslu og svo mætti áfram telja. Í sumum tilfellum borga unglingarnir sjálfir, en við megum ekki afsala okkur foreldravaldi okkar og getum óhrædd sett reglur og ramma utan um eyðslu okkar jafnt sem barnanna okkar.

Brugðust foreldrar almennt vel við þessari umræðu sem sjá má að á jólaballinu í des. var greinilegt að enginn mætti á limmósínu í það skiptið, ólíkt því sem áður hafði verið. Það er greinilegt að þegar foreldrar tala saman, þá er auðvelt að halda utan um börnin okkar og breyta óæskilegri hegðun.

Hins vegar var, af einhverjum ástæðum, meira um ölvun á sl. jólaballi en áður hafði verið. Við sjáum því enn ástæðu til að hvetja foreldra til að vera vakandi, tala saman sín á milli og fylgjast vel með börnum sínum. Gott væri ef foreldrar myndu sæu sér fært að sækja börn sín af ballinu. Væri það hvatning til þeirra að vera ekki undir áhrifum. Vert er að benda á að ölvun á balli grunnskólanna hefur í för með sér afleiðingar fyrir viðkomandi. Foreldrum er gert að sækja börn sín um leið. Viðkomandi þarf að tala við skólastjóra, aðgangur verður jafnvel bannaður á næstu böll og sumir skólar hleypa viðkomandi ekki í vorferðalag. 

Við hvetjum foreldra til þess að ræða saman fyrir 10.apríl nk. og stilla saman strengina. Ef við stöndum saman gegn hópþrýstingi, óhóflegri eyðslu og ölvun er mun auðveldara að vera foreldri og vernda börnin sín.

Með bestu kveðju og von um skemmtilega árshátíð,

F.h. FFGÍR, Foreldrafélög og foreldraráð grunnskólanna í Reykjanesbæ, ffgir@ffgir.is

Dagný Gísladóttir formaður
Ingibjörg Ólafsdóttir verkefnastjóri

Mánudagskvöldið 3. mars n.k. klukkan 19.30 verður haldið fræðslukvöld fyrir foreldra grunnskólabarna um ábyrga netnotkun í Bíósal Duus-húsa. Húsið opnar klukkan 19.15 og áætluð dagskrárlok eru kl. 21:00
Áætluð dagskrá
-Myndband um ábyrga netnotkun.
-Hafdís Kjartansdóttir sálfræðingur flytur erindi.
-Sonja Viðarsdóttir foreldri, sýnir hvernig hægt er að stjórna tölvunotkun barna og unglinga

Húsfyllir var á fyrirlestri FFGÍR sem eru samtök foreldra grunnskólabarna í Reykjanesbæ í gærkveldi en þar flutti Gylfi Jón Gylfason yfirsálfræðingur Fræðsluskrifstofu Reykjanesbæjar fyrirlestur undir yfirskriftinni: Er "unglingaveiki" á þínu heimili?

Margir foreldrar virtust þekkja þennan alræmda "sjúkdóm" sem var þó ekki alvarlegri en svo að flestir gátu hlegið dátt af ýmsum tilburðum unglingsins í þessu ástandi - sem og viðbrögðum foreldranna sjálfra.

Gylfi Jón fjallaði m.a. um togstreitu á heimilinu t.d. vegna peninga, vina, tölvunotkunar, útivistar og fleira auk þess sem hann fræddi foreldra um ýmsar rannsóknir sem komu á óvart. Lagði hann áherslu á að foreldrar setji börnum sínum reglur á meðan þau búi heima, skipti sér af og tali við aðra foreldra um viðmið s.s. vegna útivistartíma.

Fyrirlestrar sem þessir eru fastur liður í starfi FFGÍR en Gylfi Jón er þekktur fyrir  SOS uppeldisnámskeið sín sem boðin eru öllum foreldrum barna á aldrinum 2-12 ára.

Gylfi Jón Gylfason sálfræðingur  gefur foreldrum góð ráð, 
þriðjudaginn 19. febrúar 2008 kl. 20:00  í Bíósal Duushúsa.

Er togstreita á heimilinu t.d. vegna peninga, vina, tölvunotkunar, útivistar o.s.frv.? Þá er þetta fyrir þig. Við lofum skemmtilegu og fróðlegu kvöldi. Aðgangur ókeypis, kaffiveitingar í boði.

Hlökkum til að sjá þig!

Undir yfirskriftinni „Þú ert það sem þú gerir á Netinu” verður alþjóðlegi netöryggisdagurinn haldinn 12. febrúar næstkomandi. Í tilefni dagsins hefur SAFT, í samstarfi við aðrar þátttökuþjóðir, staðið fyrir nemendasamkeppni um gerð jafningjafræðsluefnis. Alls hafa 655 innlagnir verið sendar inn, þar af 33 frá Íslandi.

Verkefnin eru mjög mismunandi að gerð, allt frá plakötum yfir í myndbönd, en öll eiga þau það sameiginlegt að innihalda gnægð af upplýsingum sem geta nýst jafn til jafningjafræðslu, og foreldrum og kennurum sem vilja leiða börn og unglinga örugglega í gegnum þann flókna heim sem Netið er.

FFGÍR hefur sent foreldrum 5.-10. bekkja grunnskólanna í Reykjanesbæ eftirfarandi bréf, í kjölfar umræðna um rasisma í Reykjanesbæ:

Fræðsla gegn fordómum!

Í framhaldi af áberandi umfjöllun undanfarið um rasisma í Reykjanesbæ, vill FFGÍR vekja foreldra til umhugsunar um þessi mál. Við bendum á leiðir til að beina umræðunni í annan og uppbyggilegri farveg.

Fordómar valda vanlíðan
Það má sannarlega gagnrýna umfjöllun fjölmiðla undanfarið og líkja við æsiblaðamennsku. Við megum samt ekki líta framhjá því að margir foreldrar segja börn sín hafa uppi fyrirlitningu og fordóma í garð innflytjenda, og vita ekki hvað skuli gera til að sporna gegn því. 

Lesa allt bréfið

FFGÍR sendi umsögn til Menntamálaráðuneytis 22.jan sl. um grunnskólalögin.

Umsögnina má lesa hér

Um er að ræða ýmis konar námskeið fyrir námsfús börn í 6.-10.bekk. Nánari upplýsingar eru á www.adastra.is og hér. Fyrirspurnir er hægt að senda á fyrirspurnir@adastra.is Foreldrum og börnum í 6.-10.bekk er boðið á kynningardag Ad Astra, laugardaginn 19.janúar 2008 milli kl. 14-15 í Háskólanum í Reykjavík, Ofanleiti 2. Boðið verður upp á veitingar. Ath. að þátttakendum úr Reykjanesbæ verður veittur 5.000 kr. afsláttur við afhendingu kvittunar á bæjarskrifstofu.

Fræðslufundur í Heiðarskóla 15. janúar kl. 14.30
Hvað getum við gert til að bregðast við slökum lesskilningi og lesleikni  íslenskra skólabarna?

Fyrirlesari verður Almar Halldórsson frá Námsmatsstofnun. Farið verður  yfir niðurstöður PISA rannsóknarinnar út frá skólunum okkar og efnt til
umræðna um aðgerðir. Sýnd verða dæmi um verkefni og hvaða undirþætti  leskilnings er reynt að prófa. Næsta PISA rannsókn verður lögð fyrir í 10.bekk í apríl 2009 og þá verður
áherslan á lesskilning.

Getum við bætt kennslu og námstækni þess árgangs sem það próf þreytir þannig að mælanlegt verði? Hvernig má stuðla að  varanlegum kennsluumbótum í lestri og lesskilningi?
Mikilvægt er að kennarar eldri árganga fjölmenni.

Dagskrá:
1. Almennt um niðurstöður PISA 2006
2. Frekari greiningar ( Svindluðu Finnar?! Fer lesskilningi hrakandi?!!)
3. Frekari greiningar á áætlun.
4. Suðurland.
5. Umræður.

Vinsamlega tilkynnið þátttöku til Gunnars í Heiðarskóla eigi síðar en á mánudag þannig að unnt verði að skapa sem bestar aðstæður á staðnum.

FFGÍR óskar samstarfsfólki gleðilegra jóla, farsældar og friðar á komandi ári. Með þökkum fyrir samstarfið á árinu sem er að líða.

Verkefnastjóri er í jólafríi, en tekur aftur til starfa 2.janúar.

Menntamálaráðherra hefur lagt fram á Alþingi fjögur frumvörp til laga: Um leikskóla, grunnskóla, framhaldsskóla og um menntun og ráðningu kennara og skólastjórnenda. Menntamálaráðuneytið hefur opnað nýjan vef sem heitir Ný Menntastefna þar eru frumvörpin kynnt og öllum gefst kostur á að senda spurningar eða athugasemdir til menntamálaráðherra varðandi frumvörpin fjögur. Þeim verður svarað innan viku. Við hvetjum alla til að kynna sér frumvörpin. 

Eftirfarandi bréf hefur verið sent í tölvupósti til foreldra 8.-10.bekkinga í grunnskólum Reykjanesbæjar að beiðni FFGÍR

Jólaball Grunnskóla Reykjanesbæjar fyrir 8.-10. bekkinga verður haldið 12. desember n.k. Er það eflaust mikið tilhlökkunarefni margra, frábært framtak sem hefur farið mjög vel fram í góðri samvinnu við nemendur. Þó er ýmislegt sem má betur fara, sem snýr kannski helst að okkur foreldrum. Í kjölfar Vina og paraballsins í október sl. óskuðu margir foreldrar eftir umræðu um ýmislegt sem þar mátti betur fara s.s. þrýsting um mikinn tilkostnað sem hefur skapað streitu, ýtt undir einelti og vanlíðan margra – sem ég held að við getum öll verið sammála um að við viljum ekki. Í ljós kom að kröfurnar eru síst minni þegar kemur að jólaballinu, og árshátíðinni. Lesa alla greinina

Þorgerður Katrín Gunnarsdóttir menntamálaráðherra hefur lagt fram á Alþingi fjögur frumvörp til nýrrar menntastefnu, frumvarp til laga um leikskóla, grunnskóla, framhaldsskóla og um menntun og ráðningu kennara, skólastjórnenda við leikskóla, grunnskóla og framhaldsskóla. Hér má sjá frumvarp til laga um grunnskóla.

Í nýjasta vefriti Menntamálaráðuneytis kemur fram að í frumvarpi til laga um grunnskóla eru sköpuð skilyrði fyrir að menntun íslenska barna verði til fyrirmyndar á alþjóðavísu og velferð allra grunnskólabarna og jöfn tækifæri til náms verði tryggð.

Opnaður verður vefur www.nymenntastefna.is þar sem hægt er að kynna sér efni hinna nýju frumvarpa og senda inn fyrirspurnir til menntamálaráðherra um þær breytingar sem í þeim felast.

Nýr hjálparvefur fyrir almenning um örugga netnotkun, www.netsvar.is var opnaður á blaðamannafundi sem haldinn var í Póst- og fjarskiptastofnun í dag.

Vefurinn er samstarfsverkefni SAFT verkefnisins hjá Heimili og skóla, Póst- og fjarskiptastofnunar og Barnaheilla. Með honum er komið öflugt hjálpartæki fyrir almenning til að leita svara og spyrja spurninga um hvaðeina sem tengist öryggi á Netinu og mun vefurinn þannig stuðla að ánægjulegri og gagnlegri netnotkun allrar fjölskyldunnar.

www.netsvar.is er efnisflokkaður vefur með spurningum og svörum um hvaðeina sem sem snýr að því að gera netnotkun örugga, ánægjulega og gagnlega.  Vefurinn verður lifandi vettvangur þar sem almenningi gefst kostur á að senda inn fyrirspurnir um hvaðeina sem tengist öryggi í netnotkun og fá svör frá sérfræðingum.

Forvarnardagurinn er haldin að frumkvæði forseta Íslands í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskóla Íslands og Háskólann í Reykjavík. Verkefnið er stutt af lyfjafyrirtækinu Actavis.

Íslenskar rannsóknir hafa sýnt að þeir unglingar sem verja í það minnsta klukkustund á dag með fjölskyldum sínum, eru síður líklegir til að hefja neyslu fíkniefna. Að sama skapi sýna niðurstöður að mun ólíklegra sé að ungmenni sem stunda íþróttir og annað skipulagt æskulýðsstarf, falli fyrir fíkniefnum. Í þriðja lagi sýna rannsóknirnar fram á að því lengur sem ungmenni bíða með að hefja áfengisneyslu, þeim mun ólíklegra er að þau neyti síðar fíkniefna.

Niðurstöðurnar byggja á rannsóknum vísindamanna við Háskóla Íslands og Háskólann í Reykjavík sem hafa um árabil rannsakað áhættuhegðun ungmenna og hafa þær vakið alþjóðlega eftirtekt.

Miðvikudagskvöldið 21. nóvember n.k. klukkan 20.30 verður haldið fræðslukvöld fyrir foreldra grunnskólabarna um ábyrga netnotkun í bíósalnum í Duus húsum. Húsið opnar klukkan 20.15.

20.30  Fundarstjóri býður gesti velkomna.
20.40  Myndband um ábyrga netnotkun.
21.10  Hafdís Kjartansdóttir sálfræðingur flytur erindi.
21.30  Loftur Kristjánsson lögreglumaður fjallar um netnotkun.
21.50  Sonja Viðarsdóttir foreldri kynnir hvernig hægt er að stjórna hversu miklum tíma börnin geta verið í tölvunni.
22.00 Fyrirspurnir og umræður.
22.10 Dagskrárlok

Við bendum á nýjar og athyglisverðar greinar á heimasíðunni, undir Greinar og erindi, og Gagnlegir tenglar:

Börn eru berskjölduð á Netinu-grein sem birtist í VF í okt. sl. eftir Ingibjörgu Ólafsdóttur verkefnastjóra FFGÍR

Vina og paraball, grein sem birtist í VF í nóv. sl., eftir Dagnýju Gísladóttur formann FFGÍR

Hver á eiginlega að ala börnin upp, foreldar eða kennarar? Grein sem birtist í Netlu, veftímariti um uppeldi og menntun, eftir Nönnu Kristínu Christiansen

Menntamálaráðuneyti boðar til kynningarfundar, miðvikudaginn 14. nóvember 2007, þar sem starfsfólk Rannsóknar & greiningar, dr. Inga Dóra Sigfúsdóttir, deildarforseti Kennslufræða- og lýðheilsudeildar Háskólans í Reykjavík, Álfgeir Logi Kristjánsson, aðjúnkt við Háskólann í Reykjavík, Margrét Lilja Guðmundsdóttir, aðjúnkt við Háskólann í Reykjavík og Jón Sigfússon, framkvæmdastjóri Rannsóknar & greiningar, munu kynna helstu niðurstöður rannsóknarinnar „Ungt fólk 2007 grunnskólanemar“ er viðkemur líðan, menntun, menningu, tómstundum, íþróttaiðkun og framtíðarsýn íslenskra barna. Rannsóknin var lögð fyrir nemendur í 5., 6. og 7. bekk í öllum grunnskólum landsins í lok febrúar 2007.

Kynningarfundurinn verður haldinn miðvikudaginn 14. nóvember 2007 í félagsheimili KFUM og KFUK við Holtaveg 28, Reykjavík og hefst hann kl. 13:15. Gert er ráð fyrir að fundinum ljúki eigi síðar en kl. 16:00.

Fundarmenn fá tækifæri til að bera fram spurningar um niðurstöður úr rannsókninni að kynningu lokinni.
Fundurinn er öllum opinn og boðið verður upp á kaffi og meðlæti.
Vinsamlega tilkynnið þátttöku á netfangið: asta.ingolfsdottir@mrn.stjr.is

Formaður FFGÍR sat í gær skyndifund sem boðaður var af hálfu ungmenna til þess að ræða málefni fjörheima. Fundurinn var haldinn að ósk unglingaráðs Fjörheima en hann sóttu formaður bæjarráðs, formaður menningarráðs, fræðslustjóri, framkvæmdastjóri Menningar-, íþrótta- og tómstundasviðs og forstöðumaður Fjörheima og 88 Hússins auk starfsfólks.

Efni fundarins var framtíð Fjörheima.

Hafþór B. Birgisson kynnti drög að samningi við fræðsluskrifstofu sem nú liggur fyrir til samþykktar en þar er gert ráð fyrir að starfsemi Fjörheima fari að hluta til inn í grunnskólana til að styðja við félagsstarf þar. Þetta er gert vegna þess að Fjörheimar eru að missa húsnæði sitt í Njarðvíkum vegna framkvæmda við Stapa.

Sitt sýndist unglingunum 35 sem mættu en þau fluttu mál sitt á ábyrgan hátt og bentu á ýmsa hluti sem vert er að skoða. Meðal annars var rætt húsnæði í vélargeymslunni við 88 Húsið og húsnæði á Vellinum.

Niðurstaðan varð sú að óskað verður eftir tillögum frá öllum nemendaráðum grunnskólanna og verður í framhaldi boðað til annars fundar til að fara yfir stöðuna,.

Ráðstefna Barnaheilla: Ný tækni – Sama sagan, kynferðislegt ofbeldi gegn börnum, var haldin í Norræna húsinu þann 11. október sl. Nærri 100 manns sóttu ráðstefnuna. Fjallað var um þátt nýrrar tækni í kynferðislegu ofbeldi gegn börnum, hvernig brotamenn nota netið, brotaferlið sjálft, tengsl milli barnsins og brotamannsins, hvaða börn séu mest berskjölduð fyrir ofbeldinu, af hverju börn segi ekki frá og hvaða leiðir séu færar til að finna börn sem orðið hafa fyrir kynferðislegu ofbeldi og myndir af þeim birtar á netinu. Sagt var frá starfsemi Barnahúss og líðan barna þar. Jafnframt var rætt um rannsókn þessara mála bæði innanlands og erlendis og alþjóðlegt samstarf og stefnumótun lögreglunnar í málaflokknum og sagt frá framförum sem orðið hafa í Noregi í þessum málum á síðastliðnum árum. Fyrirlesarar voru bæði innlendir og erlendir og allir með mikla þekkingu á málefninu .

Nánar um niðurstöður ráðstefnunnar má lesa hér.

Starfsdagur er fyrir alla stjórnarmenn foreldrafélaga og ráða. Mikilvægt er að sem flestir mæti. Starfsdagurinn er góður vettvangur til að hittast, fræðast, skipuleggja vetrarstarfið, fá hugmyndir og fleira. Það er mikill stuðningur í því fyrir alla, bæði reynslujálka sem geta miðlað af sinni reynslu, og nýtt fólk sem er að taka fyrstu skrefin í foreldrastarfi.

Skráningar, með netfangi, síma og úr hvaða félagi eða ráði þið komið sendist á verkefnastjóra hér

Hér er dagskráin:

STARFSDAGUR foreldrafélaga og foreldraráða grunnskóla Reykjanesbæjar
Á sal Holtaskóla, þrið. 16.okt.  kl. 17:15 - 19:45

17:00 Húsið opnað. Kaffi og með því. Afhending fundargagna

•  kynning þátttakenda

• “Hagir og líðan ungs fólks í Reykjanesbæ”-niðurstöður Rannsóknar og Greiningar -  Ása Eyjólfsdóttir-verkefnastjóri forvarna í Reykjanesbæ

•  “Starf FFGÍR í fortíð og framtíð” Dagný Gísladóttir-formaður FFGÍR –

•  “Foreldrastarf-ávinningur og ábyrgð” Ingibjörg Ólafsdóttir-verkefnastjóri FFGÍR-


18:40-19:00 hlé, léttar veitingar

• Verkefnavinna foreldraráða-og félaga- verkefni vetrarins

• Niðurstöður verkefnavinnu –umræður

• Endurmat


19:45 Starfsdegi lokið

Þessa vikuna er forvarnarvika í Reykjanesbæ. Í því sambandi viljum við minna á að foreldrar eru besta forvörnin. Foreldrasamstarf og samstarf heimila og skóla hafa gríðarlegt forvarnargildi og er eitt aðalmarkmið og hugsjón FFGÍR. Yfirskrift forvarnaravikunnar er Samvinna-Þátttaka-Árangur og nánari dagskrá og upplýsingar má sjá á heimasíðu Reykjanesbæjar.

Nú er hauststarf FFGÍR hafið og foreldrafélög og foreldraráð grunnskólanna farin að undirbúa starf vetrarins. Súsanna Fróðadóttir lét af störfum sem verkefnastjóri sl. vor, og Ingibjörg Ólafsdóttir kom til starfa að nýju, en hún hefur gegnt því starfi frá haustinu 2004 til nóv.2006. Bráðlega verður birt fundadagatal vetrarins, og verið er að uppfæra stjórnarlista FFGÍR, en enn er óljóst víða hvernig verkum verður skipt milli stjórnarmanna í foreldrastarfi skólanna en það skýrist á næstu dögum.

Stefnt er að sameiginlegum starfsdegi allra meðlima foreldrafélaga og foreldraráða, um miðjan október. Tími, dagsetning og staður verður auglýst nánar síðar.

Fjöldi sjálfboðaliða frá FFGÍR tók þátt í rekstri athvarfs Fjölskyldu- og félagsþjónustu, Útideildar og Lögreglunnar í Keflavík.
Sjálfboðaliðar skiptu á milli sín föstudags og laugardagskvöldinu frá kl. 10:00 og fram eftir nóttu og gekk allt vel fyrir sig. Þetta er í þriðja sinn sem FFGÍR tekur þátt í þessu verkefni og segjast sjálfboðaliðar þátttökuna hafa verið mjög fróðlega og vakið þá til umhugsunar.

Tekið var á útivistarbrotum og ölvun ungmenna sem ekki höfðu náð 18 ára aldri.

Rannveig Einarsdóttir yfirfélagsráðgjafi FFR sendir FFGÍR og sjálfboðaliðum eftirfarandi þakkir:

Kveðjur til foreldra sem störfuðu í athvarfinu á Ljósanótt
Þau stóðu sig einstaklega vel undir miklu álagi og var mikill fengur að þeim. Við viljum þakka þeim innilega fyrir og það er ljóst að starfsemi athvarfsins hefði ekki gengið án þeirrar þátttöku.

Aðalfundur FFGÍR verður haldin þann 24.maí 2007 í bíó sal Duus húsa.

Dagskrá auglýst síðar.

Verkefnastjóri

FFGÍR óskaði eftir upplýsingum hjá Reykjanesbæ vegna verðs á skólamáltíðum í kjölfarið á lækkun virðisaukaskatts á matvæli.

Í svari fjármálastjóra Reykjanesbæjar kom fram að máltíðirnar eru undanþegnar virðisaukaskatti.
Þær máltíðir sem boðið er upp á í mötuneytum grunnskóla Reykjanesbæjar eru aðkeyptar og verð til Reykjanesbæjar er bundið samningi við framleiðanda sem er Matarlyst ehf.
Verðið fylgir neysluvísitölu og er endurreiknað í ágúst ár hvert. Máltíðirnar eru undanþegnar virðisaukaskatti og því hefur lækkun virðisaukaskatts á matvæli ekki áhrif til lækkunar a´verð nema í gegnum breytingu neysluvísitölu.

Einnig kom fram að Reykjanesbær niðurgreiðir skólamáltíðir í áskrift niður um u.þ.b. helming og býður upp á ódýrustu skólamáltíðir á landinu eða kr. 185 fyrir máltíð í áskrift.

Í ágúst sl. hækkaði verð frá verktaka um 8% en verð í áskrift til nemenda var óbreytt og niðurgreiðsla Reykjanesbæjar því hækkuð.

Á vef Morgunblaðsins er sagt frá matreiðslumanninum Eiríki Finnssyni sem sér um mötuneytið fyrir um það bil 640 nemendur og starfsfólk í Breiðholtsskóla í Reykjavík.  Fyrir um það bil tveimur árum þróaði hann tölvukerfi fyrir mötuneyti skólans sem hafði áður úthlutað nemendum plöstuð handunnin spjöld sem voru síðan götuð fyrir hverja máltíð.

Nýja tölvukerfið reynist vel. Börnin slá inn fjögurra stafa leyninúmer þegar röðin kemur að þeim og starfsfólkið fær þá samstundis aðgang að öllum upplýsingum um nemandann á tölvuskjá.

Þetta er sniðugt kerfi og höfðum við heyrt af því hjá ffgír - kíkið á eftirfarandi slóð: http://mbl.is/mm/frettir/frett.html?nid=1265650

Aðalfundir foreldrafélaga og ráða grunnskólanna í Reykjanesbæ eru og verða haldnir á næstunni.
Alltaf er pláss fyrir gott fólk til starfa sem hefur áhuga á að taka þátt í mótun skólastarfs. Hafið samband við formenn foreldrafélaga og foreldraráða og látið vita ef þið hafið áhuga á að taka þátt eða mætið á aðalfund. Athugið þó að þeir sem mæta á aðalfund eru alls ekki skyldugir til þess að taka sæti í stjórn. Það er lika mikilvægt að foreldrar hittist og ræði um skóla barna sinna - og hitti aðra foreldra.

Aðalfundur FFGÍR verður haldinn 24. mai n.k. eftir að aðalfundir allra grunnskólanna í Reykjanesbæ hafa farið fram.

Ný vefsíða FFGÍR er nú komin í loftið og er hún unnin í vefumsjónarkerfinu ConMan en fyrirtækið Dacoda styrkti gerð vefsíðunnar myndarlega. Kunnum við þeim bestu þakkir fyrir.
Nýja vefsíðan gerir okkur kleift að uppfæra efni á mun auðveldari hátt og einnig geta önnur félög sett inn eigið efni.

Á vefsíðunni má nálgast upplýsingar um markmið FFGÍR, helstu verkefni, fundargerðir og aðrar upplýsingar um samstarf heimilis og skóla í Reykjanesbæ.

Boðið er upp á leit og einnig er hægt að stækka og minnka letur og prenta í prentvænu viðmóti út síður af vefnum.

Þð er von okkar að nýja vefsíðan nýtist okkur betur og að þið verðið dugleg að senda inn efni og fréttir af því sem er að gerast í ykkar skólum.